CEBU, Philippines - Mikulit og laing dungog si LeBron James atol sa 107-87 nga demolisyon sa Cleveland Cavaliers batok sa Brooklyn Nets sa nagkainit nga aksiyon sa National Basketball Association kagahapon didto sa Quicken Loans Arena sa Cleveland, Ohio.

Ang four-time MVP miiskor og 24 puntos ug mipasa og 11 ka assists, apan ang labing mahinungdanon mao ang iyang pagsaka ngadto sa ika-12 nga puwesto sa all-time NBA scoring list.

Human gikumpleto ang iyang three-point play sa nahabilin nga 3:52 sa unang kuwarter, si James nakatigum na og kinatibuk-ang 26,671 puntos sa iyang karera.

Iyang nalabwan si NBA legend Dominique Wilkins, nga ika-13 na karon sa listahan bitbit ang 26,668 puntos atol sa iyang Hall of Fame career uban sa Atlanta Hawks, the Los Angeles Clippers, Boston Celtics, San Antonio Spurs ug Orlando Magic.

Lain pang naligsan ni James mao sila si Jerry West, Reggie Miller, Alex English, Kevin Garnett, Paul Pierce, John Havlicek ug Tim Duncan.

Posible sab nga mabiyaan ni James si Oscar Robertson nga mitali og 26,710 puntos sa iyang karera, alang sa ika-11 nga dapit atol sa ilang duwa batok sa Atlanta Hawks karong buntag.

Si Kevin Love midugang og 19 puntos alang sa Cavaliers nga naglabaw na karon og duha ug tunga ka duwa sa Toronto Raptors isip topseed sa Eastern Conference bitbit ang 53-22 win-loss record.

Sa laing mga duwa, si Nikola Mirotic mipatuasik og 28 puntos ug si Jimmy Butler miamot og 21 aron agakon ang Chicago Bulls ngadto sa 103-100 nga kadaugan batok sa Houston Rockets.

Sila si Evan Fournier ug Nikola Vucevic nagkumboya’g 49 puntos aron paggiya sa Orlando Magic nga milubong sa Indiana Pacers, 114-94.

Ang Bulls nakadaog og duha ka sunod-sunod nga higayon human sa ilang upat ka sunod-sunod nga pilde, apan iwit gihapon kini sa Pacers alang sa ikawalo ug katapusang luna sa playoff sa East. Samtang ang Magic naka-3-0 na human makatilaw og unom ka sunod-sunod nga kaparotan.

Emmanuel B. Villaruel (Banat NEWS)